私隱聲明

私隱聲明

「香港便民地圖」係一個免費公共工具，唔使開戶口、唔使登入，亦唔會收集你嘅姓名、電話或者電郵。呢頁逐項講清楚：邊啲資料留喺你部機、邊啲會send去我哋伺服器、邊啲交咗畀第三方，以及點樣刪除。

最後更新：2026-09-15。本聲明同時涵蓋 Android 應用程式「Hop In 車埋我」嘅網絡功能，詳見下面獨立一節。

一、留喺你部機嘅資料

以下全部存喺你瀏覽器嘅 localStorage，唔會傳送到我哋或者任何第三方。清除瀏覽器資料就會即時消失。

二、位置資料

只有當你撳「使用我的位置」或者允許瀏覽器定位，我哋先會攞到你嘅座標。座標會送去我哋伺服器，用嚟搵附近設施、計路線同車費，唔會寫入任何資料庫，亦唔會同任何身分連繫。你亦可以完全唔開定位——輸入地址或者地標一樣用得。

要坦白講一點：同所有網站一樣，我哋嘅寄存商（Google Cloud Run）同 Cloudflare 會保留標準伺服器記錄，入面包含請求網址（因此包括你查詢嗰個座標）、IP 位址、時間同瀏覽器類型。呢啲記錄由供應商按其預設期限保存，我哋唔會用嚟分析個別使用者。

三、分析（Google Analytics）

我哋用 Google Analytics 4 睇整體使用情況，例如邊個圖層多人開、邊版多人睇。送出嘅事件名稱來自一張固定清單，唔會夾帶自由文字。送出之前，網址入面呢啲參數會被刪走： lat, lng, q, name, a, b, pin，即係你嘅座標、搜尋字、地點名同路線起訖點都唔會去到 Google Analytics。Google 會為分析設定自己嘅 cookie；你可以用瀏覽器設定或者廣告攔截器阻止。

四、我哋會儲存嘅少量資料

除咗公開數據本身，我哋數據庫只有以下四類記錄：

• 設施回報 — 你主動撳「回報」時提交嘅內容：設施名稱同座標、問題類別、你寫嘅備註（如有）、介面語言、瀏覽器 User-Agent、reCAPTCHA 分數，以及一個每日更換嘅 IP 雜湊值（用嚟防濫用，唔係用嚟識別你）。原始 IP 位址唔會儲存。
• 路線選擇量度 — 當你喺路線結果入面撳其中一條，我哋記低日期、時段、平日／假日、選咗第幾項、交通模式、比最快慢幾多分鐘，同一個每日更換嘅 IP 雜湊。起點同終點、你搜尋嘅字、任何 Google 傳回嘅文字，一律唔會記低。行程本身只以一個單向雜湊值代表（由沿途嘅政府車站編號計出；如果附近冇車站可對應，就用一個約 110 米嘅座標格），雜湊值冇得還原成地址。
• 圖層使用次數 — 純粹係「呢個圖層今日被開啟咗幾多次」嘅數字，唔附帶任何識別資料，用嚟決定介面上邊啲分類行先。
• 天氣通知訂閱 — 如果你開咗惡劣天氣通知，瀏覽器會產生一個推送端點同兩條加密金鑰，連同語言設定儲存。通知本身由你瀏覽器供應商嘅推送服務（Chrome 用 Google、Firefox 用 Mozilla）派送，所以該服務會知道有通知送去你部機。喺設定入面關閉通知就會刪除訂閱。

五、第三方服務

打開呢個網站，你嘅瀏覽器會直接連去以下幾個域名。「直接連去」即係話對方會見到你嘅 IP 位址同瀏覽器資料，就算我哋唔傳任何嘢畀佢哋都一樣：

• Google 地圖（maps.googleapis.com、maps.gstatic.com）——地圖磚同地點搜尋，受 Google 私隱政策規管。
• Google Fonts（fonts.googleapis.com、fonts.gstatic.com）——介面中文字體。字體係畫面渲染嘅一部分，冇得關閉；如果你唔想連去，需要用瀏覽器擴充功能攔截。
• jsDelivr（cdn.jsdelivr.net）——的士收費錶嘅七段顯示字體，只有你開啟的士面板時先會載入。
• Google Analytics（googletagmanager.com、google-analytics.com）——見上一節。
• reCAPTCHA（google.com/recaptcha）——只有你打開回報表格時先會載入，用嚟分辨真人。
• Cloudflare——內容分發同防護，所有請求都會經過。

另外幾類連線唔會暴露你嘅 IP，因為由我哋伺服器代你發出：

• Google Directions／Places——路線用座標查；地點名同地址核對用你打嘅文字查（地址核對只會喺政府 ALS 唔肯定嗰陣先問 Google）。Google 收到嘅係嗰段文字或者座標，唔會收到你嘅 IP。
• 香港政府地址資料實驗室（ALS，als.gov.hk）——當你輸入地址搜尋，或者用地址核對功能時，你打嗰段文字（地址核對會先整理過：拆走室／樓層、展開簡寫）會送去政府嘅地址查詢服務換取座標同標準地址。呢個係香港政府自己嘅服務，但都係一個第三方，所以列明喺呢度。Hop In 嘅路線規劃如果用地址而唔係座標，亦行同一條路。
• 政府及營辦商數據源——公廁、車費、天氣、實時班次等由我哋伺服器定時或即時抓取，過程唔涉及你嘅資料。

我哋唔會出售、出租或者交換任何資料，唔展示廣告，亦唔會建立使用者檔案。

六、資料存放喺邊、保留幾耐

本服務運行喺 Google Cloud Run 同 Cloud SQL 嘅 asia-southeast1（新加坡）地區，即係話上面提到嘅記錄同伺服器日誌係喺香港境外處理同存放。Cloudflare 亦會喺全球邊緣節點快取公開頁面（唔包含任何個人資料）。

• 設施回報——無限期保留，因為要憑佢核對同修正數據；你可以要求刪除。
• 路線選擇同圖層次數——本身就係統計數字，冇個別身分可言；IP 雜湊每日更換，隔日已經對唔返。
• Hop In 即時分享——連結 12 小時後失效，記錄喺建立後 2 日內清除。
• Hop In 行程記錄——無限期保留，可憑安裝編號要求刪除。
• 伺服器日誌——由 Google 同 Cloudflare 按其預設期限保留，我哋唔控制該期限。

另外，本網站係一個可安裝嘅網頁應用程式（PWA）。Service worker 會喺你部機快取頁面同上一次嘅查詢結果，等你離線都用得；呢份快取喺你部機入面，清除網站資料或者解除安裝就會刪除。

七、Hop In 車埋我（Android 應用程式）

「Hop In 車埋我」係一個的士收費錶模擬器。預設情況下，所有嘢都留喺你部電話——行程記錄、路線、收費計算全部本機處理，唔會上傳。只有以下三項功能會連網，頭兩項要你主動開啟，第三項淨係喺你自己輸入起訖點時先會用到：

7.1 分享行程數據（自選）

如果你開啟咗，行程完結時會送出一行記錄：一個隨機產生嘅安裝編號（UUID，同你本人無關，重裝即變新）、應用程式版本、手機型號、收費表類別、開始同結束時間、距離、等候時間、總車費、GPS 點數，以及四捨五入到小數點後三位（約 100 米）嘅起點同終點座標。

請特別留意：如果你喺應用程式選擇連埋路線一齊上傳，呢行記錄仲會包括你當程實際行過嘅 GPS 軌跡（最多 3000 點，並無像起訖點咁模糊化）。軌跡會顯示你由邊度去到邊度、行過邊條路。如果你唔想上傳軌跡，喺應用程式關閉該選項；已經上傳咗嘅，可以憑安裝編號要求刪除。

呢啲記錄只會用嚟睇整體使用情況，唔會公開個別行程。

7.2 即時分享收費錶（自選）

撳「分享」會產生一條連結，任何人收到都可以喺瀏覽器睇住個錶跳。期間手機每 5 秒上傳一次收費錶狀態（車費、距離、等候時間、狀態），可以連埋最近嘅行車軌跡。分享權杖只以 sha256 形式儲存，我哋本身都讀唔返。你可以隨時結束分享；連結亦會喺 12 小時後自動失效，記錄喺建立後 2 日內清除。請留意：連結冇密碼，收到嘅人喺分享期間都睇得到。

7.3 路線規劃

當你喺應用程式輸入起點同終點估算車費，嗰兩個地點（座標，或者你打嘅地址文字）會送嚟我哋伺服器：地址會經政府 ALS 換成座標，然後我哋代你向 Google Directions 攞行車路線，回傳距離、時間、途經隧道同一條簡化路線。呢啲唔會寫入資料庫，只會喺伺服器記憶體快取 30 分鐘以免重複計費，重啟即冇。

同本網站一樣，呢個請求嘅網址（因此包括嗰兩個地點）會出現喺寄存商嘅伺服器記錄入面。如果唔想咁，可以直接喺應用程式用收費錶而唔用路線規劃。

關閉任何一項功能，就唔會再有新資料送出。想刪除已經送出嘅行程記錄，請用下面嘅聯絡方法，連同應用程式「關於」頁嘅安裝編號一齊提供，我哋會刪除該編號嘅所有記錄。

八、你嘅權利

根據香港《個人資料（私隱）條例》（第 486 章），你有權查閱及改正我哋持有關於你嘅個人資料。由於本網站唔會收集姓名、電郵或者帳戶，一般情況下我哋手上並無可以對應到你本人嘅資料；Hop In 嘅安裝編號係唯一例外，而你可以憑該編號要求刪除。

九、兒童

本工具並非針對兒童設計，亦唔會刻意收集兒童資料。

十、聯絡同修訂

如果有私隱方面嘅查詢，或者想要求刪除 Hop In 嘅記錄，可以喺地圖上任何一個設施撳「回報」，喺備註寫低你嘅要求。本聲明如有修訂，會更新頁頂嘅日期；重大改動會喺網站公告。